Meiga systkyni eða aðrir fjölskyldumeðlimir/vinir koma með?
Þar sem ekki er um greiningarsónar að ræða þá ráða foreldrar því hverjir koma með. Við höfum gott pláss fyrir 2 fullorðna auk föður. Eldri systkyni eru velkomin en það er gott að hafa í huga að börn yngri en 6 til 7 ára halda ekki athyglinni nema stutta stund og geta því truflað upplifun foreldranna. Að gefnu tilefni biðjum við foreldra sem taka börn sín með að hafa þau hjá sér í skoðunarherbreginu og ítrekum að börn sem koma með eru á ábyrgð foreldra.

Fást engar myndir af barninu ef fylgjan er á framvegg?
Það er ekki samasemmerki milli þess að fylgjan sé staðsett á framvegg og að engar eða óskýrar myndir náist. Það er alltaf undir legu barnsins og legvatnsmagni komið hvernig útkoman verður. Ef barnið grúfir sig ofan í fylgjuna getur hins vegar verið vandkvæðum bundið að ná góðum myndum en oftast er hægt að fá barnið til að færa sig að hluta til eða alveg. Um það bil helmingur allra sem koma á sónarskoðun hjá 9 mánuðum eru með fylgjuna á framvegg.

Af hverju eru myndirnar sem vinkona mín fékk skýrari en mínar myndir?
Það eru svo mörg atriði sem hafa áhrif á útkomu myndanna eins og vefjaþéttni (uppbygging bandvefs) móður, lega og stelling barns, staðsetning fylgju, meðgöngulengd, legvatnsmagn og fitulag á kviðvegg móður, fyrirlægur ristill eða örvefur og/eða hnútar á fyrirlægum vef, eitthvað sem enginn veit fyrir skoðun. Þar af leiðandi getum við aldrei tryggt fyrirfram hvernig útkoman verður en við getum þó lofað því að við náum alltaf bestu myndum miðað við aðstæður.

Er nauðsynlegt að sjá kyn barnsins?
Nei, ef foreldrar vita ekki og vilja ekki vita kyn barnsins þá er ekkert mál að sleppa því að skoða það svæði.

Hvenær er best að koma í 3D sónarskoðun?
Hjá okkur er skoðað frá viku 22- viku 36. Hvenær fólk velur að koma fer svolítið eftir því hverju verið er að sækjast eftir, en flestir velja að koma í vikum 26-30. Meðgöngulengdin hefur eingöngu áhrif á útlitsþroska barnsins á myndunum en ekki skýrleika myndanna. Þannig getum við fengið jafn skýrar myndir í viku 22 og í viku 36 séu aðstæður fyrir hendi. Þó viljum við biðja mjög þéttvaxnar konur um að koma ekki fyrr en í viku 26-27 í fyrsta lagi.

Hvað fáum við margar myndir?
Foreldrar fá eina mynd á pappír og svo allar myndir og hreyfimyndaskeið á CD disk. Við reynum að miða við að foreldrar fái 20-40 myndir en vinsamlega athugið að það fer alltaf eftir krílinu hvað fást margar myndir og hvort við náum hreyfimyndum.

Get ég gert eitthvað til að auka líkurnar á að barnið verði vakandi?
Í rauninni er ekki til nein ein leið sem virkar hjá öllum til að vekja krílið. Það er samt góð hugmynd að borða eitthvað síðustu klukkustundina fyrir sónaskoðun gjarnan kolvetnaríkt, t.d. vínber, banana eða drekka glas af hreinum ávaxtasafa.

Hvað tekur skoðunin langan tíma?
Hver skoðunartími tekur á bilinu 25-40 mínútur. Mismunur á tíma felst í því að stundum þarf að vekja börnin eða fá þau til að snúa sér til að hægt sé að taka af þeim mynd en það getur tekið smá tíma. Ef börnin liggja heppilega strax í upphafi er skoðunartíminn styttri.

Hvernig borgar maður?
Tekið er við öllum algengustu tegundum greiðslukorta, nema American Express. Einnig er hægt að greiða með peningum.

Hvað kostar að koma í sónarskoðun og hvað er innifalið?
Ein skoðun kostar 13.900. Við fleiri en eina skoðun á sömu meðgöngu er veittur 20% afsláttur.
Innifalið í verðinu er skoðunin sjálf, 1 mynd á pappír og svo allar myndir sem teknar eru, bæði kyrrmyndir (3D) og hreyfimyndaskeið (4D) á geisladisk.

Kostar tvöfalt ef um tvíburameðgöngu er að ræða?
Nei, sama gjald er fyrir alla.
Foreldarar verða þó að hafa í huga að það er sami tími fyrir tvíburaskoðun og fyrir einburaskoðun. Þess vegna gefst skiljanlega ekki sami tími á hvert barn og við einburaskoðun. Einnig verða foreldrar að hafa í huga að það er ekki öruggt að það náist jafngóðar myndir af báðum börnum.

Hvað þarf að panta með löngum fyrirvara?
Við tökum yfirleitt ekki við pöntunum fyrr en eftir 20 vikna sónarinn. Það má reikna með 2-4 vikna bið eftir tíma. Ef ekki er óskað eftir ákveðnum tíma við pöntun þá bjóðum við fólki að koma milli viku 26 og 30 sem er algengasti tími fyrir þrívíddarsónarskoðun.